काठमाडौँ, १७ जेठ । राष्ट्रिय सभाको बैठक कार्यसूचीमा प्रवेश नै नगरी स्थगित भएको छ ।
आइतबार बिहान सवा ११ बजेका लागि तय गरिएको बैठक करिब एक घण्टा ढिलो गरी सुरु भएको थियो । बैठक सुरु भएपछि शून्य समय सञ्चालन गरिएको थियो, जसमा केही सांसदहरूले आफ्ना धारणा राखे ।
त्यसपछि सभाध्यक्ष नारायण दाहालले विशेष समय नराखिएको जानकारी दिँदै बैठक २० मिनेटपछि बस्ने गरी स्थगित गरेका हुन् ।
आजको कार्यसूचीमा प्रधानमन्त्री तथा गृहमन्त्री बालेन्द्र शाहले प्रतिनिधि सभाबाट सन्देशसहित प्राप्त ‘प्रतिनिधि सभा सदस्य निर्वाचन (पहिलो संशोधन) विधेयक, २०८३ माथिको दफावार छलफल सदनमा गरियोस्’ भन्ने प्रस्ताव प्रस्तुत गर्ने कार्यक्रम थियो ।
त्यसपछि सो विधेयक पारित गरियोस् भन्ने प्रस्ताव पनि प्रस्तुत गर्ने तयारी थियो । साथै, प्रतिनिधि सभाबाट सन्देशसहित आएको ‘मतदाता नामावली (पहिलो संशोधन) विधेयक, २०८३’ पनि आजै पारित गर्ने कार्यसूची रहेको थियो ।
तर, बैठक कार्यसूचीमै प्रवेश नगरी स्थगित भएको हो ।
संसद् स्रोतका अनुसार दुवै विधेयकमा परेका संशोधनका विषयमा सरकारसँग थप छलफल आवश्यक भएकाले बैठक स्थगित गरिएको हो ।
यस विषयमा राष्ट्रिय सभामा रहेका दलका प्रतिनिधिसँग कानुन, न्याय तथा संसदीय मामिलामन्त्री सोविता गौतमले छलफल गरिरहेकी छन् ।
प्रतिनिधि सभा सदस्य निर्वाचन ऐन संशोधन विधेयक र मतदाता नामावली संशोधन विधेयकमा तीन/तीन वटा संशोधन दर्ता भएका छन् ।
टिप्पणीहरू
टिप्पणी लेख्नुहोस्