काठमाडौं । राष्ट्रिय स्वतन्त्र पार्टी ले पहिलो महाधिवेशनलाई केन्द्रमा राख्दै देशभर संगठन विस्तार र अधिवेशन अभियानलाई तीव्र बनाएको छ । फागुनमा गर्ने तय भएको महाधिवेशन चुनावका कारण स्थगित भएपछि पार्टी अहिले भदौ वा असोजभित्र महाधिवेशन सम्पन्न गर्ने तयारीमा जुटेको हो ।
महाधिवेशन केन्द्रित रणनीतिअन्तर्गत पार्टीले वडा र पालिका अधिवेशन दुई चरणमा सञ्चालन गर्ने निर्णय गरेको छ । समिति गठन नभएका वडाहरूको भेला जेठ २ गते बोलाइएको छ भने वैशाख २० अघि गठन भएका वडा समितिको अधिवेशन जेठ ३ गते हुनेछ ।
पार्टी प्रवक्ता मनिष झा का अनुसार जेठ ९ गते पालिका भेला आयोजना गरिनेछ । वैशाख २५ अघि समिति गठन भएका पालिकाको अधिवेशन जेठ १० गते गर्ने निर्णय गरिएको छ । बाँकी वडा समितिको अधिवेशन जेठ १६ गते र पालिका अधिवेशन जेठ १७ गते सम्पन्न गरिने कार्यतालिका तय गरिएको छ ।
रास्वपाले जेठ २३ र २४ गते जिल्ला अधिवेशन गर्ने निर्णय गरिसकेको भए पनि प्रदेश तथा केन्द्रीय महाधिवेशनको मिति भने अझै सार्वजनिक गरेको छैन । विधानअनुसार महाधिवेशन गर्न कम्तीमा ६ महिनाअघि सूचना दिनुपर्ने व्यवस्था छ ।
पार्टी नेताहरूका अनुसार चुनावका कारण रोकिएको अधिवेशन प्रक्रिया अब “फास्ट ट्र्याक” मा अघि बढाइएको छ । आवश्यक स्थानमा तदर्थ समिति गठन गरेर भए पनि अधिवेशन सम्पन्न गर्ने तयारी गरिएको छ ।
रास्वपाको निर्वाचन आयोगका अनुसार चुनावअघि ४५२ वडा र ६२ पालिकाको अधिवेशन सम्पन्न भएको थियो । निर्वाचन आयोगका सचिव भूमिनन्द बराल ले चुनावपछि पनि दुई सयभन्दा बढी वडामा अधिवेशन भइसकेको जानकारी दिएका छन् । उनका अनुसार बारा बाहेक अधिकांश जिल्लामा वडा अधिवेशन चलिरहेको छ ।
संशोधित विधानअनुसार अब रास्वपाको केन्द्रीय समिति १२९ सदस्यीय हुनेछ । महाधिवेशनबाट केन्द्रीयदेखि वडा तहसम्मका ६ तहका निर्वाचित संरचना गठन गरिनेछ ।
टिप्पणीहरू
टिप्पणी लेख्नुहोस्