राष्ट्रिय स्वाधीनतामाथि गम्भीर संकट आएको प्रचण्डको दाबी

Pushpa Kamal Dahal ले नेपालको कम्युनिस्ट आन्दोलनलाई सखाप पार्न देशी–विदेशी प्रतिक्रियावादी शक्तिहरू योजनाबद्ध रूपमा सक्रिय रहेको बताएका छन्। २६औँ निर्मल लामा स्मृति दिवसका अवसरमा आइतबार काठमाडौंमा आयोजित कार्यक्रममा बोल्दै उनले कम्युनिस्ट आन्दोलनमाथि गम्भीर चुनौती आएको बताएका हुन्।

पूर्वप्रधानमन्त्री दाहालले कम्युनिस्ट पार्टीहरूले पहिले आफ्नै कमजोरीहरूको समीक्षा गरेर सुधार गर्नुपर्ने र सिंगो आन्दोलनलाई एकताबद्ध गर्दै नयाँ ढंगले अघि बढ्नुपर्नेमा जोड दिए। उनले जनतामा अझै पनि कम्युनिस्ट शक्तिप्रति भरोसा कायम रहेकाले नेतृत्वले त्यसअनुसार जिम्मेवार भूमिका निर्वाह गर्नुपर्ने बताए।

उनले नेपालको राष्ट्रिय स्वाधीनता इतिहासकै सबैभन्दा अप्ठ्यारो अवस्थामा पुगेको दाबी गर्दै पछिल्ला राजनीतिक घटनाक्रमले मुलुकको स्वाधीनतामाथि संकट सिर्जना गरेको टिप्पणी गरे। यद्यपि, ती नकारात्मक परिस्थितिभित्रै कम्युनिस्ट एकताको सकारात्मक आधार रहेको उनको भनाइ थियो।

प्रचण्डले कम्युनिस्ट आन्दोलनलाई एकताबद्ध बनाउन Mohan Bikram Singh ले अभिभावकीय भूमिका खेल्नुपर्ने आवश्यकता औँल्याए। साथै उनले अहिलेको सरकारले गरिब, निमुखा र श्रमजीवी वर्गमाथि बढी पीडा दिएको आरोप लगाउँदै वर्गीय पक्षधरतालाई बलियो बनाउन कम्युनिस्ट एकता अपरिहार्य रहेको बताए।