भारतमा खाना पकाउने एलपीजी ग्यासको मूल्यमा फेरि वृद्धि गरिएको छ। शनिबार रातिदेखि लागू हुने गरी घरेलु एलपीजी सिलिन्डरको मूल्यमा २९ भारतीय रुपैयाँ बढाइएको हो।
नयाँ मूल्यसूचीअनुसार आइतबारदेखि दिल्लीमा १४.२ किलोको घरेलु एलपीजी सिलिन्डरको मूल्य ९४२ भारतीय रुपैयाँ पुगेको छ। पछिल्लो तीन महिनाभित्र घरेलु ग्यासको मूल्य बढेको यो दोस्रो पटक हो। यसअघि मार्च ७ मा प्रतिसिलिन्डर ६० भारतीय रुपैयाँ वृद्धि गरिएको थियो।
घरेलु ग्याससँगै व्यावसायिक प्रयोजनका लागि प्रयोग हुने एलपीजी सिलिन्डरको मूल्य पनि निरन्तर बढिरहेको छ। जुन १ मा १९ किलोको व्यावसायिक सिलिन्डरको मूल्य ४२ भारतीय रुपैयाँले बढेर ३ हजार १ सय १३ रुपैयाँ पुगेको थियो। बीबीसीका अनुसार मे महिनामा मात्रै व्यावसायिक सिलिन्डरको मूल्य करिब १ हजार रुपैयाँले बढाइएको थियो।
भारत सरकारले अन्तर्राष्ट्रिय बजारमा कच्चा तेलको मूल्यमा आएको तीव्र वृद्धिलाई मूल्यवृद्धिको मुख्य कारण बताएको छ। फेब्रुअरी अन्त्यदेखि पश्चिम एसियामा बढेको तनाव र तेल आपूर्तिमा देखिएको अवरोधका कारण विश्वव्यापी ऊर्जा बजार प्रभावित भएको छ।
भारत आफ्नो ऊर्जा आवश्यकताको ठूलो हिस्सा आयातमार्फत पूर्ति गर्ने भएकाले अन्तर्राष्ट्रिय बजारको मूल्यवृद्धिको प्रत्यक्ष असर भारतीय उपभोक्तामाथि परेको पेट्रोलियम मन्त्रालयले जनाएको छ।
हाल भारतभर ३३.३७ करोड परिवारसँग एलपीजी कनेक्सन रहेको छ। तीमध्ये प्रधानमन्त्री उज्ज्वला योजना अन्तर्गतका १०.५८ करोड विपन्न परिवारसमेत मूल्यवृद्धिबाट प्रभावित हुने भएका छन्।
यसैबीच, मे महिनामा पेट्रोल र डिजेलको मूल्य पनि चार पटक बढाइएको थियो। मे १५ देखि २५ सम्म पेट्रोल र डिजेलको मूल्य प्रतिलिटर ७ देखि ७.५ भारतीय रुपैयाँसम्म बढेको जनाइएको छ।
विश्लेषकहरूले पश्चिम एसियाको तनाव चाँडै समाधान नभए आगामी दिनमा इन्धन तथा ग्यासको मूल्य अझै बढ्न सक्ने बताएका छन्।
टिप्पणीहरू
टिप्पणी लेख्नुहोस्