नेपाल प्रहरीले मानव बेचबिखनविरुद्ध सञ्चालन गरेको विशेष अभियान अन्तर्गत ठूलो सफलता हासिल गरेको छ। प्रहरीले एकै दिन ललितपुर र पर्साबाट भारततर्फ बेच्न लगिएका ४ जना बालिकाको सकुशल उद्धार गरेको हो।
प्रहरीका अनुसार पर्सास्थित नेपाल–भारत सीमाबाट भारततर्फ लैजाँदै गरिएका ३ जना साना बालिकालाई उद्धार गरिएको छ भने ललितपुरको खुमलटारमा बसोबास गर्ने अर्की एक बालिकालाई पनि प्रहरीले सुरक्षित रूपमा फेला पारेको जनाएको छ।
प्रारम्भिक अनुसन्धानअनुसार ती बालिकालाई विभिन्न प्रलोभन देखाएर भारतको दिल्ली पुर्याई बेच्ने योजना बनाइएको थियो। ललितपुरकी बालिकालाई दिल्ली जाने बसको टिकट काटिरहेको अवस्थामा प्रहरीले विशेष सूचनाको आधारमा उद्धार गरेको बताइएको छ।
घटनामा संलग्न रहेको आरोपमा २ जना भारतीय नागरिकसहित ३ जनालाई प्रहरीले पक्राउ गरेको छ। पक्राउ परेकामाथि मानव बेचबिखन तथा ओसारपसार सम्बन्धी मुद्दामा थप अनुसन्धान भइरहेको नेपाल प्रहरीले जनाएको छ।
नेपाल प्रहरीको यो सफल अभियानले मानव बेचबिखनजस्तो जघन्य अपराध नियन्त्रणमा सुरक्षाकर्मी सक्रिय र संवेदनशील रहेको स्पष्ट देखाएको छ। साथै, सीमावर्ती क्षेत्रमा हुने मानव तस्करी नियन्त्रणका लागि निगरानी अझ कडा बनाइएको प्रहरीले जनाएको छ।
टिप्पणीहरू
टिप्पणी लेख्नुहोस्